Logo saeuber-gmacht

alli Frage & Antworte


Warum dä Name Muus säubergmacht?

Ich bin sit ich uf d`Welt cho bin immer d Muus vo minä Elterä gsi und drum hani au grad dä Name für mis Label gwählt. Zudem passt „M“ grad i doppleter Hinsicht… ersten heissi Martina und sit em Mai 2014 no Meili zum Nachname… also grad 3 Ms uf einmal.

Säubergmacht isch für dä eini oder anderi viellicht chlii komisch. Es isch berndütsch und det im wunderschöne Emmental im Dorf Namens Trub lieged mini Wurzle. Leider schwätzi dä wunderschöni Dialäkt nöd.

Sodeli jetzt wüssed ihr warum mis Lable „MUUS säubergmacht“ heisst.

Was isch MUUS säubergmacht?

MUUS säubergmacht ….

…sind Produkt wo mit sehr viel Liebi und Herzbluet vo Hand hergstellt werdet.

…isch en kreative mix us diversä Materialie wie zum Biispiel Stoff, Papier, Karton, Bänder und und und und….

…sölled Produkt sii wommer im Alltag chan bruche.

…sölled Produkt sii wommer selber Freud dra hät oder andernä bim verschenkä chan e Freud dämit mache.

…sölled indivduelli Produkt sii womer au chan uf Wunsch abänderä, apasse, so dass es für dich stimmt.

…söll au als Ideewerkstatt chönä gnutz werdä.

…was für mich nie sölled werde sind Masseprodukt. Sie sölled uf ihri ganz bestimmti Art einzigartig sie und bim herstellä au selber Freud mache.

Warum es eiges Label?

Bim nähe schaff ich sehr gern mit Webbänder oder Webetikette. Es git sehr viel Webetikette mit „von Hand gemacht“, „Handmade“, „made with love“ und und und… aber das sind Webetikette wo jede/i anderi au chan kaufe und bruche und seit gar nüt drübert us wommer das Produkt genau kauft hät, bzw. wers gmacht hät. Drum hani gfunde ich wetti öppis eiges. Öppis wommer gseht das mers selbergmacht hät, wers gmacht hät und vor allem das es es handgmachts Produkt isch. Wo i dä Schwiiz hergstellt worde isch.

Wie hät alles agfange?

Das ich en kreativä Mensch bin hani scho lang irgendwo gmerkt. Aber bis jetzt isch mini Kreativität nur im Bereich Papier und Karton gsi. Jede i dä Familie und im engste Früündeskreis hät selbergmachti Chärtli becho uf dä Geburtstag, uf Wiehnachte, ufs Hochziit oder uf Geburt vom Chind… oder au eifach so zum mal Hallo oder Merci säge…

Ja und im 2014 hät en neue Bereich vo minerä Kreativäsiite agfange wo ich gar nöd so kennt han *Nähmaschine*. Dä Uslöser däfür isch gsi, dass min Maa mich gfröget hät öb ich ihn wetti hürate. Während dä Vorbereitig isch natürlich au Thema Gastgeschenk ufcho. Ok was chönt mer den da mache, wo nöd alli andere scho gmacht händ wommer iglade gsi sind. Zudem sölls e Erinnerig sii wo`s Freud dra händ, chönd bruche und nöd eifach die Heime im Egge verstaubt. Mengä Abig hani im Internet verbracht bis i uf Nastüechli cho bin für Freudeträne… guet so es einzigs Nastüechli mit eme Papierband drum isch ja au nöd so toll als Erinnerig. Da bini uf die tolle Siite vo Dawanda gstosse und han det es Tatüta (Taschentüchertasche) gseh. Perfekt! Nur jetzt chunt die nächsti Herusforderig. Nähe a dä Nähmaschine…. Ohoooo! Guet ich han au nach dä Schuel immer wieder mal öppis seeeeeeehr eifachs a dä Nähmaschine gmacht. Aber das isch grad chlii e anderi Liga. S Mami MUUS hät gmeint „nein nein das isch ganz eifach…“ ja wenn das Mami MUUS seit muss da ja scho so sii. So hämmer es ganzes Weekend lang für jede Gast so es Täschli gmacht. Natürlich no miteme extra agfertigtä Webetikettli und Mannä händ e anderi Farb becho als Fraue. Schlussendlich isch es mit em 10er Päckli Nastüechli gfühlt worde… ab dem Ziitpunkt hät mich Nähmaschine packt und ich han mit mim Mami es super mega Lexikon. Well sie isch uf dä Nähmaschine und im zeichnä vo Schnittmuster echt mega mässig (isch aber kei glernti Schniederin).

I dä Zwüscheziit zeichni sogar scho selber Schnittmuster für Täsche (natürlich erst mal ganz eifachi Sache). Aber jedesmal wenni mini Idee vom Kopf innes Schnittmuster umsetzä chan und s Resultat den au no guet isch, han ich e mega Freud dran….

Kreativ sii isch für mich en super Usglich zu minerä suschtigä brueflichä Tätigkeit. Ich chan mich entfalte…. Energie tanke… minä Gedanke freie Lauf la… und biner Bstellig sogar ame andere Menschen au e Freud mache….

Ich möchti a dere Stell au ganz fescht mim Maa Danke säge, dass er mir dä Freiruum laht damit ich mich so chan entfalte…. Mine Elterä für ihri ehrlichi Meinig wenni wieder mal en Rat bruche öb ich das Produkt so chan umsetzä, wenni nöd ganz sicher bin oder wenni es Lexikon bruche welli nüme wiiter weiss.

Wer isch d MUUS?

Min Name isch Martina Wüthrich… besser gseit sit em Mai 2014 isch min Nachname Meili

Bin glernte Detailhandelsangstellti i dä Branche Papeterie, han div. Wiiterbildigskurs bsuecht unter anderem hani de Abschluss als Eidg. Dipl. Detailhandelsspezialistin und schaffe sit de Geburt vo eusere Tochter im April 2016 nüme uf de Branche, da ich zur Ziit kei Teilziitstell finde. Han bis zur Geburt au dörfä bi eusem Branchenachwuchs die praktische Lehrabschlussprüefig abnäh.

Wämmer mich nöd grad i mim kreativä Egg die hei findet (was vorallem sit de Geburt vo eusem Sunneschii nur no Zabig vorchunt oder am Wuchenendi)….

Gnüss ich nätürlich i erste Linie euse Sunneschii mit em fast tägliche Spaziergang, Kriede male uf dem Weg und allerlei Sache uf em Spielplatz z'unternä oder bi schlechtem Wetter au mal öppis z'bastlä. Es findet sich aber au immer wieder mal Ziit zum i eusem (Gmües-) Garte öppis z'machä.

Ja und bi all dene Tätigkeite chömed mir immer wieder neui Idee in Sinn. Zerst werdets mal im Kopf zäme gspunnä, denn uf Papier zeichnet, evt. bruchts au no es Schnittmuster wo ich zeichne und schlussendlich mal früecher oder spöter werdets den au gnäht.

So ich hoffe das ich euch möglichst viel Frage han chönä beantworte, aber au glichziitig nöd glangwiilt han.